Plantun de Prouvènço

Pèr coumpara dos planto d'encò nostre

Amaranthus blitoides & Aegilops cylindrica

Amaranthus blitoides

Amaranthaceae

Nom en français : Amarante fausse blette.

Descripcioun :
Aquesto amaranto rebalo au sòu dins lis ermas e lis escoumbre proche d'oustau. Sèmblo proun à l'amaranto-blanco mai aquelo d'aqui èi, au contro, bèn drecho. Peréu li fueio eici soun pas oundado e bourdado de blanc, e li grano soun mai grosso. Lou dessouto èi bèn blanc e pas verd coume pèr Amaranthus graecizans.

Usanço :
Coume lis àutris amaranto, l'amaranto-faus-blet se manjo cruso en ensalado vo cuecho coume d'espinarc (pas trop n'en manja pamens pèr l'acide óussali e li nitrate). Li grano se manjon cruso, grasihado o boulido (15 mn) coume voulès.

Port : Erbo
Taio : 10 à 50 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Amaranthus
Famiho : Amaranthaceae

Ordre : Caryophyllales

Coulour de la flour : Verdo
Petalo : 5
Ø (o loungour) enflourejado : 0,5 cm
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun
Setèmbre à nouvèmbre

Liò : Ermas - Champ - Ribiero
Estànci : Termoumediterran à Mesoumediterran
Couroulougi : Cousmoupoulito
Ref. sc. : Amaranthus blitoides S.Watson, 1877

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.